तस्विर सौजन्य : जिल्ला प्रहरी कार्यालय ताप्लेजुङ
ताप्लेजुङ — असार २२ गते मेरिङदेन गाउँपालिका-३ दोभान बजारबाट हराएको ट्र्याक्टरसहित एक जनालाई प्रहरीले नियन्त्रणमा लिएको छ । मे १ त ७१७१ नम्वरको ट्र्याक्टर सहित त्यसलाई चलाईरहेका चालक प्रकाश मगरलाई पक्राउ गरेको हो ।
प्रहरी निरीक्षक कमल कुमार लुङगेलीका अनुसार दोभानबाट हराएको ट्र्याक्टर फुङलिङ नगरपालिका-१० फुरुम्वूको बैदारेमा २३ गते फेला परेको थियो । तर फुङलिङ नगरपालिका-८ घर भएका चालक प्रहरीलाई देखेपछि ट्र्याक्टर छोडेर भागेका थिए ।
२६ गते उनलाई घरमै लुकेर बसेको अवस्थामा फेला पारी पक्राउ गरिएको र अदालतबाट म्याद थप गरी आवश्यक अनुसन्धान सुरु भएको लुङगेलीले जानकारी दिए ।
दोभानका जय प्रसाद भट्टराईले सञ्चालन गर्दै आएको ट्र्याक्टर आफ्नै घर अगाडि आँगनमा पार्किङ गरेको ठाउँबाटै राति हराएको प्रहरीले जनाएको छ । मुलुकी अपराध संहिता २०७४ अनुसारको मुद्दा चलाई अनुसन्धान सुरु भएको प्रहरी कार्यालयले जनाएको छ ।