ताप्लेजुङ – श्रावण ११ देखि बेपत्ता भएका फुङलिङ नगरपालिका ११ फावाखोलाका प्रकाश भट्टराई मृत भेटिएका छन । मैवाखोला गाउँपालिका ३ साँघुको नारायणी माविका शिक्षिका रहेकी श्रीमती सपना राई भट्टराईलाई भेटेर फर्कने क्रममा बेपत्ता भएका थिए ।

श्रावण ११ गते फावाखोला घर जान्छु भनी हिँडेका उनी घरमा नपुगेको र फोन पनि स्विच अफ भएपछि परिवारले खोजी थालेका थिए । आफन्त, जंगल, खोला लगायतका क्षेत्रमा खोजी गरेपनि नभेटिएका उनलाई साँघुकै जङ्गलमा मालिङ्गो काट्नेले मृत भेट्टाएको फुङलिङ नगरपालिकाका पूर्व उप प्रमुख समेत रहेका बमबहादुर भट्टराईले बताएका छन् । उनले आत्महत्या गरेको हुनसक्ने आशङ्का गरिएको भट्टराई बताउँछन् ।

पछिल्ला दिनमा उनमा मानसिक समस्या देखिएको रहेछ, भट्टराईले भने डिप्रेसनको आशङ्का भयो । त्यसै कारणले उनले गलत निर्णय लिएको हो की भन्ने आशङ्का गरिएको बमबहादुर बताउँछन् ।