ताप्लेजुङ — मन्त्री भएपछि पहिलो पटक गृह जिल्ला ताप्लेजुङ आउन लागेका कोशी प्रदेशका उद्योग कृषि तथा सहकारी मन्त्री खगेन सिं हाङगामको गृह जिल्लामा भव्य स्वागतको तयारी गरिएको छ । नेपाली काँग्रेस जिल्ला कार्य समितिको आयोजनामा सोमबार सामुदायिक भवन सिटिहलमा स्वागतको तयारी गरिएको सचिव युक हांवीर हाङगाम (डम्बर) द्वारा जारी सूचनामा उल्लेख छ ।
नेपाली काँग्रेस जिल्ला कार्य समितिका पदाधिकारी, सदस्य, महासमिति तथा महाधिवेशन प्रतिनिधि, वडा पदाधिकारी, भातृ तथा शुभेच्छुक संस्थाका प्रमुख, पदाधिकारीलाई अनिवार्य उपस्थितका लागि काङ्ग्रेसले सूचना जारी गरेको छ । स्वागत सँगै दशैंको शुभकामना आदान प्रदान, प्रदेशको समृद्धि र विकासकालागि राजनीतिक परामर्श कार्यक्रम समेत रहेको सचिव हाङगामले जनाएका छन् ।
बाढी पहिरोका कारण पाँचथरको हेवाखोलामा सडक अवरुद्ध भएका कारण मध्य पहाडी राजमार्ग भएर आउने मन्त्री हाङगामका स्वकीय सचिव अशोक आङ्बुहाङले बताएका छन् । आइतवार बेलुका तेह्रथुमको सग्रान्ती बजारमा बस्ने हाङगाम सोमवार आठराई त्रिवेणी गाउँपालिकाको निगुरादिन, फूलबारी, हाङपाङ हुँदै दोभान भएर आउने आङबोहाङले बताए । मैवाखोला र आठराई त्रिबेणी गाउँपालिकाका शुभेच्छुकले भने दोभान बजारमा स्वागत गर्ने र मन्त्रीसँगै सदरमुकाम आउने कार्यक्रम रहेको जनाइएको छ ।
बहानन्दे देखि मोटर साइकल र्याली सहित सदरमुकाम भित्र्याउने र स्वागत कार्यक्रमलाई भव्य बनाउने तयारी काङ्ग्रेसले गरेको छ । यसअघि असोज १४ गते स्वागतको तयारी गरेको काङ्ग्रेसले बाढी पहिरोका कारण २१ गतेका लागि सारेको हो । मन्त्री हाङगाम दशैं भरी गृह जिल्लामै बस्ने स्वकीय सचिव आङ्बुहाङले बताएका छन् ।