ताप्लेजुङ – तिहार नजिकिँदै गर्दा जिल्ला प्रशासन कार्यालय ताप्लेजुङले देउसी भैलोलाई मर्यादित बनाउन आग्रह गरेको छ ।

सहायक प्रमुख जिल्ला अधिकारी सन्दिपा खड्काले एक विज्ञप्ति प्रकाशित गरी चाडपर्वका समयमा सार्वजनिक स्थलमा होहल्ला र झैझगडा नगर्न, मादक पदार्थ सेवन गरी पारिवारिक र सामाजिक जनजीवन साथै सार्वजनिक मर्यादा र शान्ति सुरक्षामा खलल पुर्याउने  गतिविधि नगर्न आग्रह गरेकी छन् ।

जिल्लाको समग्र शान्ति सुरक्षालाई दृष्टिगत गरी तिहारमा खेलिने देउसी भैलोलाई मर्यादित र व्यवस्थित बनाउन पनि विज्ञप्तिमा आग्रह गरिएको छ । जुवातास, लङ्गुबुर्जा नखेल्न नखेलाउन, भुइँचम्पा, पटका आतिसबाजी विस्फोटक तथा प्रज्ज्वलनशील पदार्थ प्रयोग र बिक्री वितरण नगर्न पनि आग्रह गरिएको छ ।

यसलाई बेवास्ता गरी सामाजिक सद्भाव भड्काउने, समाजको वातावरण प्रदूषित बनाउने, विपत्जन्य घटना निम्त्याउने जस्ता कार्य भए गरे कानुन बमोजिम कारबाही गर्नेपनि प्रस्ट्याइएको छ । विगतमा जस्तो देउसीभैलो का लागि समय भने निर्धारण गरिएको छैन ।