पाँचथर — इलामको सूर्योदय नगरपालिका–११ सुन्तलेका ५१ वर्षीय धनराज राईको हत्यामा संलग्न भएको आरोपमा प्रहरीले राईकै छोरा–बुहारीसहित ६ जनालाई पक्राउ गरेको छ ।
पक्राउ पर्नेमा धनराजका २९ वर्षीय छोरा एडवड राई, बुहारी (एडवड) की श्रीमती २६ वर्षीया मालती तामाङ (राई) सहित रहेको जिल्ला प्रहरी कार्यालय इलामले जनाएको छ ।
प्रकाउ परेका अन्य ४ जनामा २४ वर्षीय छिमेकी नवीनकुमार राई, २६ वर्षीय निसान राई, २० वर्षीय राजीव राई र २३ वर्षीय दिवस राई रहेको इलामका प्रहरी प्रमुख (एसपी) एकनारायण कोइरालाले जानकारी दिए ।
धनराजको शव माघ २८ गते आफ्नै घरको भुइतलास्थित गोप्य कोठामा भेटिएपछि प्रहरीले अनुसन्धान थालेको थियो ।
मृतकको टाउको अगाडि र पछाडिको भागमा ठूलो गहिरो चोट लाग्नुका साथै कोठामा रगत लतपतिएको तथा कोदालो, फलामको रड र आग्लो जस्तु वस्तु भेटिएपछि हत्या भएको हुनसक्ने आशंकमा छोरा–बुहारी सहित ६ जनलाई पक्राउ गरी अनुसन्धान थालिएको पनि कोइरालाको भनाइ छ ।
सोमबार साँझ पक्राउ परेका उनीहरुलाई जिल्ला अदालतबाट मंगलबार नै ८ दिनको म्याद थप गरी अनुसन्धान सुरु गरेको प्रहरीले जनाएको छ ।